還未知道的名字

有段時間無更新了，
本來已經要很努力很努力才能在香港生活，
但最近發生的事令人感覺這已經接近不可能的任務，
在這種情況下，還有什麼值得記錄分享呢？

報導說下禮拜天氣轉涼，
冬天出世的我的確比較喜歡冬天，
在香港，十零度對好多人黎講，包括我阿媽，已經叫好凍，
但相比經歷過零下廿幾度的冬天的我，
雪都無粒，實在濕濕碎。

2011年的冬天，正在加拿大的倫敦Western U交流，
自己一個人住，閒來無事喜歡上網看電影，
一月下旬的某一個下大雪的晚上，
落堂跟幾個意大利和新加坡朋友去酒吧坐了一會，
回到Apartment，關上房門，
按計劃要睇兩齣戲，第一齣便是新海導演的《秒速５厘米》，
結果不睇則已，一睇不能自已，
雖然當時同拍拖三年既女朋友感情好好，
但一個畢業在即，另一個卻準備考A-Level，
那種面對前路的迷茫，
不知道踏入社會後能否繼續在一起，
令我足足擔心兼傷心幾個星期。

結果幾年後回望，擔心既事終究變成現實。
時間和空間就像平交道上交錯的列車，
列車駛過，不同步的兩人總得分開。

終於在前日，看了新海誠的新作《你的名字》，
導演用一個快樂的結局去包裝愛情與生活的殘酷和無奈，

極唯美的畫面，與透過神明改變錯失的時空。
可恨是即使出盡全力，
當初的我還是沒有能力去改變什麼。
成長的遺憾，有遺忘愛情的初衷，
也有失去那種不顧一切向前衝的力量，
任由一切在成長的過程中一點點地了消失，
取而代之，是一條條數，計掂數才有下文。

新海誠是創作的鬼才，像Christopher Nolan一樣膽大心細，
大膽建築現實虛幻交錯的世界，
細心地編排細節與故事，
是讓人看得入迷的主因。

現實中錯過的時空畢竟不能重來。

如果真有這麼一個人，
雖然我還說不出妳的名字，
卻是一見面便記得妳的人，
只願妳現在在某處生活安好。

力場

臨近中秋偏偏要打風落雨，
掛足一日一號風球，
黃昏時天邊一片詭異的紫紅色，
大有山雨欲來的感覺。
未知「李氏力場」會否發揮作用，
有安樂窩的人固然希望多日假，
但即使係香港，畢竟仍有好多人過著好天晒落雨淋的生活，
人大了反而希望無風無雨。

這邊廂天氣不似預期，
那邊廂環球經濟也滿佈暗湧。
奇怪的是，現今科技發達，
精密的氣象衛星令大家連有颱風即將形成都可以及早知道，
而風暴吹得越近越烈時,大家都知道要去安全地方暫避；
但面對因通訊發達而流通的海量資訊，
人對於數據與新聞背後反映的正在形成的經濟風暴卻往往後知後覺，
或許人類天生就有過份樂觀的基因，
推動社會進步的在各行業打拼的冒險家創業者，
很多都只因為一點希望與願景而踏出第一步。

人生有很多險要冒險,
哪怕你天生膽少怕事、超級Risk-adverse,
仍會迫你做很多十足賭搏的高風險決定。
大眾之所以冒險，是因為不能坐以待斃，
通脹會悄悄地將你的財富蠶食盡，
所以大家仍會努力冒巨大的風險進行一場又一場投機。
只可惜香港這個小城即使有力場保護免受颱風吹襲，
在經濟危機中卻未見得會有力場防護，
甚至會離風眼很近，很可能風雨飄搖。

4月中下旬時，韓進集團旗下全球第七大航運公司韓進海運，
向債權人申請債務重組，
4個月後，韓進海運終於在8月份申請破產保護，
在航運業連年不景氣下，
韓進的負債比連年攀升，
雖然一眾航運股在韓進爆煲後因為憧景行業過剩產能將得到整合消化而股價造好，
但眼見波羅的海乾散貨在低位徘徊，
反映需求仍十分疲弱，
所以任憑供應調整都只能抒緩過度競爭，
並無助令行業重回增長軌道。
更嚴重的是，通過收購合併整合行業產能，
除了企業變得更龐大，
也可能因為競爭減少而變得臃腫無效率。

同樣的道理也可以應用在中國的情況上，
當日夜強調「供給側結構性改革」時，
對應的只是去槓桿和過剩產能可能引發的經濟硬著陸，
基本上說白了已是指增長無望。
即使有人說國內消費市場快速增長，
但全球當製造業江河日下，
而國民累積的財富嚴重不均，
中產階層的消費增長仍比不上過度投資後的衰退。
大國企的整個只能對股價帶來短暫的刺激，
我深信官僚和國家資本主義並不會因為合併而變得有效率，
未來幾年，我們姑且看看諸如中車等央企的整合成效吧！

9月13日大陸經濟數據比預期好，
背後卻有不少特殊因素，
包括因年內減稅優惠將完結而暴增的汽車銷售，
拉動8月社會消費品零售總額增長10.6％；
以及因7月水災而令部分固定資產投資推遲至8月份進行，
令8月份數據高於原有水平。
另一方面，美國官員對9月加息的說法反覆，
市場卻選擇性地給了反應，
鷹派言論引發大成交急瀉，
卻沒有因為其後的鴿派言論大幅反彈，
似乎猶豫的投資者們在24,300的高位被鎖住，
餘下的則傾向保留購買力。

即使美國9月不加息，
打了幾年逆境波的企業，
包括油企、航運等，隨時有機會再有巨人倒下，
大家要小心提防，不要等風暴吹到門口才準備，
再者，在之前一段時間的升浪中市場已消耗不少購買力，
後市仍不太樂觀。

偏聽

最近在看上世紀初的投資大師巴魯克 (Bernard Baruch) 的自傳。

很多人都愛區分投資與投機,

仿佛兩者水火不容,

在人類社會中,非黑即白的二元論總是大有市場,

從宗教中的神與魔鬼,

到政治上的建制非建制,

一刀切當然能將事情化繁為簡,

但一如所有二元論都會面對界線模糊的問題,

我們無法從結果上區分投資與投機,

即使在操作上,投資與投機操作也可能由於客觀環境改變而變得無法區分。

經濟學認為利息是投資行為的收入,

是延遲消費的補償,也是消費的機會成本,

那麼,所有運用因延遲消費而閒置的資金以獲取補償的行為都是投資。

如果只是根據俗世那種粗疏的標準,

我相信世界上所有投資大師,

不論誰都會有投資和投機的操作,

但其實不論投資還是投機,

不僅目標都是獲利,

而且執行時都經過下面這一個周期:

收集訊息  >製定策略  >執行

三者在整個過程中都是缺一不可,

所有投資人必需對自己的決定負責。

所謂市場經濟,就是讓大眾對社會資源運用進行投票,

與選舉有別的是,投的是鈔票,

而且一人多票,錢夠多就可以投票,

當資本累積到一定程度,

能夠對社會資源運用進行有影響力的投票,

就是金融家(Financier),

我的夢想是成為金融家,

雖然遙遠,但還是不斷努力學習。
借用替英國國皇愛德華六世打理財富的猶太銀行家Sir Ernest Cassel的一句話:
「When as a young and unknown man I started to be successful I was referred to as a gambler. My operations increased in scope. Then I was a speculator. The sphere of my activities continued to expand and presently I was known as a banker. Actually I had been doing the same thing all the time.」

所有事都有一個微不足道的開始,
但都離不開其本質,
願大家共勉。

最近做了幾個印象深刻的Trade,

雖然由於投入資金很少,

不論贏輸都不痛不癢,

但經驗卻非常重要。

犯了不少錯誤,所以即使有盈利,

仍要記錄下來,留待日後再反思。

對於學習,每個人都帶有偏見。
有時候,人只學習自己想要的,
但往往那些你忽略了的,
其實也有巨大的價值,
一直以來自以為價值投資才是投資的不二法門,
但價值投資也並非一成不變,
也許一直以來自己都太偏聽,
大腦自動篩選掉那些可以讓自己成長的經驗和反思,
才會造成許多許多的錯誤。

地產怪股

是咁的,香港樓市癲早已經舉世皆知,
但樓市係回調幾個月後,又再企定反彈(跟據中原城市領先指數數字),
一眾地產股亦表現回勇,
因著好奇,最近搵左好多關於樓市既資料,
每個人都渴望擁有水晶球,
但最終絕大部分(if not all)其實都只係為現實發生既事搵個理由做籍口說服自己接受,哈哈!
不過時間緊迫,留返有時間先同大家詳細討論啦!

所以,今日純粹簡單搵左咁多隻本地既股價同成交量 (Source: 雅虎財經),
當中有個別一兩隻形勢幾有趣的,
到底未來會有乜變化呢?

1113.HK 長實地產

0101.HK 恆隆地產

0083.HK 信和置業

0017.HK 新世界發展

0016.HK 新鴻基地產

0014.HK 希慎興業

0012.HK 恆基兆業

咁多地產股中,新地同恆地係惟二近期成交急降既股票，
其中恆基既成交量同股價大幅度背馳，

作為行業龍頭,呢件係一件相當吊詭既事，
恆基既50天、100天平均成交都係自2010年年初超過5年半以黎最低水平，

股價(經調整收市價)則係近年高位徘徊，

成交少股價悶,卻係(見頂?!)爆單邊前會既景象。

恆地作為本地地產幾大龍頭，

集中發展高密度中小型單位，

可算食正過去幾十年家庭少子化既潮流，

亦最能代表受惠經濟起飛的年輕新中產階層，

恆基今日出成績表，

將是反映香港住宅樓市的重要指標。
如果香港打工仔收入無增長，
樓市已係臨界點，
最近長實地產就表示要轉型，
樓市已近頂位基本上無懸念，
但下行週期卻並一定以雪崩式暴跌發生，
觀乎信貸與按揭狀況似乎不會引發災難，
但辣招之下的確又難以催生大泡沫。

咁我點睇?哈哈哈哈哈哈哈！

香港地做大生意有個神級logic，

就係麵包一定要貴過麵粉，

只要呢句智障廢話仲流傳，

就表示情況未係太差，至少對於一眾天龍人大亨來說是如此。

變臉

話說,今朝8點幾未開市,
電視台係咁講港股點強勢點好,
一開市,所有電話即刻響唔停,
但開市半個鐘倒跌80點,
主持人即刻憂心重重地問:係咪仲有力上呢?
電話線亦都歸於平靜。

哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈

Mr. Market堅係一個痴線佬,
日日對住佢係人都顛,
但作為能屈能伸既講故佬,
只要學識畀兩錢肉緊同極速變臉,
真係長做長有,
好似係,除非唔係。

尋寶

成長於90年代的我,
和同我一齊長大既朋友們,
大部分都有一個放學衝返屋企睇卡通片既童年,
上禮拜書展見到一堆家長買左一喼喼既書同補充,
而家小朋友放假都要操卷操TSA再加要上一堆「興趣班」,
實在感謝當年父母同學校無畀我地太多workload。

講到卡通,要數影響力最大既幾套,
一定係寵物小精靈Poke'mon同數碼暴龍Digimon。
上年唱Digimon主題曲既和田光司不敵癌病復發離世,
fb上一輪洗版潮;
朋友間一陣嘆氣;
一個時代既結束,
意味再不情願都要長大,
進入人生另一階段。

如果話和田離開帶黎哀傷同絕望,
咁幾個星期橫掃全球既Pokemon Go就帶黎興奮同希望,
我地離兒時只能想像同憧憬既世界又近左一步,
呢一刻遊戲玩落仍有種Incomplete既感覺(說來慚愧,我捉精靈進度緩慢,到目前只有55種精靈),
但即使PG唔係第一隻用到GPS既遊戲,
能夠用上AR等新技術,配以如此經典的卡通,
有人用埋無人機等遙控捉精靈,
打破左虛擬同真實世界不行平行玩既界限(以前Wii就帶動作感應,但無法走出屋外),
呢一小步仍然意義重大。

雖然我搵極都未搵到啟暴龍;
御三家亦只有一開始送既奇異種子,
但係尋寶既過程中我跑左成日黃埔、半個馬鞍山,
每日收工都去一d從來無去過或者好耐無去過既地方行個幾兩個鐘,
出一身汗、同陌生人傾幾句偈,
都係過程中既得著。

講開尋寶,咁岩最近有套新電影亦很貼題。
上週末終於去左睇《Finding Dory》,

第一集上映時我讀中一,
沙士剛過,經濟蕭條,
一年都無機會入一次戲院,

咁多年已經幾乎忘記呢齣戲。

電影前半段頗悶,

但後面漸入佳境,

故事寓意頗深,

總算不負Pixar之名。

一條轉個頭連父母叫咩都唔記得既魚,

展開尋親長征之旅,

零碎出現的回憶片段幫助多莉逐一解決危機,
絕對活在當下的多莉總算找到自己的身世,
旅途臨近尾聲,
多莉發現最重要既事,
就係認識自己、搵到自己,
原來呢個無記憶、無過去、一無是處既自己,
唔單止唔係孤單一個,
係其他人心目中亦有獨特既位置。

尋寶既過程遠比結果重要,
因為寶物/目標得一個,
一係搵到,一係搵唔到,
但過程中係學會既技能隨時有四五六七種,
思考方法令你突破自己思想既框框,
限制越多,越迫你你有限資源中發揮無限可能。

每次想到我呢一代人面對種種社會問題同不公,
並不單單存在於香港,
而且呢一刻全世界都無人解決到,
上一代人在山之巔俯瞰,
看不見路途之崎嶇,
但我地一代人所經歷既重重困難,
正正係為解決我呢一代人既問題鋪路,
江山代有才人出,
惟願在尋找令社會向世界變得更好的路途上,
人學會令自己變得更好。

誰在沽匯豐?

只要世界有人,就有金融,

人類係充滿想像力既動物,

我地既祖先能夠走出野外,

靠既唔單係由打獵到耕種,

人類進化至今,

生存更需要動聽既故事,

金融正正係人類想像到極致所衍生出黎,

有唔同Belief既人因著自己所相信既故事做所謂買賣、存貸,

明明只係一堆虛幻既數字,

但又實實在在出現係你我生活當中。

脫歐已成定局,

未投之前大家驚到不得了,

到頭來就算投左脫歐,

最壞既情況仍然無發生,

而轉眼間到美國銀行業績期,

似乎又唔係好受對面海影響,

不過對面海既行家似乎就無咁好彩。

講緊係匯控(0005.HK),

即使管理層保證會維持派息,

股價似乎好一段時間都無起色,

雖然散戶一次又一次頂住泰山壓頂既沽盤,

脫歐當日單一隻匯豐已經過百億成交,

難免會令人好奇,到底邊個係度買貨?

又有邊個係到沽貨?

如是者,就順便搵埋過去2014年到而家既CCASS變化,

挺有趣的,畀大家望一望:

(source: webb-site)

原來,由上年12月中開始,負責處理港股通交收既中國證券登記結算

有限責任公司(china securities depository and clearing)經歷過幾輪掃貨,

現在已經係匯控係CCASS既第五大持倉登記人(前四位分別為匯豐、花旗、中銀、渣打),

截至7月15日,佔所有已發行股份既2.51%,

以收市市值約9千9百億計,值成2百幾億。

係呢段時間,除左滬港通既買盤外,

中銀係最積極增持匯控,

由2014年10月開始,

登記係中銀CCASS倉入面既匯豐由3.23億股升至6.26億,

以股數計多左接近一倍;

而花旗所持股量亦有所增加,

而減持得最多既係摩根大通,

同2014年年頭比,足足減少左一半,

持股比例由大約3.33%跌至不足1.7%,

排名亦由第二跌落第七。

而整體黎講,

由14年年中至今,匯控係CCASS入面登記既股數不斷上升,

As at 2014年1月,匯控已發行股數係CCASS對non-CCASS既比例係30.67%對69.33%;
而到今年7月中,兩者比例已經變成39.33%對60.67%,
如下圖:

(source: webb-site)

兩者此消彼長,不斷有貨流入CCASS,
好多時將貨拎入CCASS係為方便沽貨,
但入左又唔代表會即時沽,
但都會影響供求,咁會對股價有咩影響呢?
或者下次可以補埋股價圖同時序表一齊做下功課。

而最底一條紅線,係Brokers揸貨(經紀/券商直接持有),
藍色Custodians即係代客持有,
例如你係中銀有股票戶口,買左好多5號,
d貨就係計入經紀代客持有。
表面上,Brokers揸貨係呢段時間入面都由4.52%升到8%,
不過就算多左3%都不能完全解釋流入CCASS既10%貨去左邊,
除左可能大家心太淡將d萬年實貨拎返晒出黎之外,
都要小心有d大戶因睇淡而悄悄減持,

打完文發現又到禮拜一,
祈求工作順利、今個禮拜唔好再落雨。

總要在雨天

記得一月尾一個落大雨既朝早,

遲起身趕返工仲要截唔到的士,

返到公司都成十點。

但係我開口咀咒自己既不幸之前,

同事竟然仲早過我講粗口,

原來就係嗰幾分鐘,恆發洋參(0911.HK)股價高台跳水,

我就明白,世界上畢竟有好多人比自己不幸,

而且好多事其實可以突然間發生係你眼前。

事隔唔夠半年,1月28日上晝既事仲瀝瀝在目,

咁岩今朝(7月6日)又落大雨,

返到公司膝頭以下都濕晒,

偏偏有另一間公司股價亦都直墮懸崖超過九成,

睇黎唔止分手,連＿＿都總要在雨天。

公司叫樂亞國際(8386.HK / 8195.HK),

8字頭既股票,未必好多人識,

但高峰期市值過百億既佢,

其實係一家紡織品製造商,

相比之下,呢幾年掙扎轉型而股價每況愈下既思捷環球,

以今日收市價5.76元計,

市值只有111億,

一家代工廠比品牌更值錢,

唔係話唔得,富士康都大過唔少山寨品牌N倍,

但名不經傳又分餅唔大既企業,

如果無一堆莊家參與,

係唔會有嗰個價。

如果用心留意恆發同樂亞,

其實有好多共通既地方:

1) 股價大幅攀升,短時間內已經遠超招股價

2) 交投少,令股價係跳水前有一段時間高居不下,莊家散唔到貨

3) 開市時間排盤疏落,造成股價易有大波幅

4) 最重要但亦係最難知既一樣,係大股東押左股畀證券行/財仔

相比起又合又供既財技股,

其實係股價第一波大地震時傷既應該唔算多,

但之後幾波餘震就可能因為貨流左入市場變成人踩人,

所以行走江湖,萬事小心為上。

水都抽到七七八八,

下面做返多少功課記錄在案,

希望以後有相似既情況時可以及早發現借鑑。

十間啤殼上市既公司,十間都有莊家揸住重貨,

為左方便散貨走人,d貨已經登記晒係中央倉(CCASS),

所以,如果可以睇到呢間公司既CCASS既持股分佈,

就可以搵到到底邊幾間行揸莊。

感謝David Webb同webb-site,

每一間上市公司CCASS倉由咩人揸貨、一個莊揸住邊幾隻貨只係click兩下就一目了然。

時間關係,由今1月1號到今日(港股T+2交收,實質係星期一既交易)既CCASS分佈如下:

(source: webb-site)
可見有過半貨在CCASS,當中又以Brokers(證商直接持有)佔多數,Custodians(證商代客持有)只佔很少數。

(source: webb-site)
呢張圖打仗咁亂,
講緊既係由1月1日至今,
做左T+2日交收後持有最多樂亞股票嗰15間行,
以及佢地持股既比例。
可以見到由6月尾至7月4日,
Custodians突然升(6月尾的交易,T+2變7月頭交收,7月4日交易則今日交收),
揸最多貨鼎成及海通開始散貨,
睇第一張圖見到,散左既貨流左出街(由Brokers轉左去Custodians),
睇落只係郁好少,
但相對一隻排盤疏落既股票,
其實莊家多數都已經等到好唔耐煩。

有心人或者可以參透到更多,
不過聽日唔係weekend,
為左可以精精神神過我兩點一線既生活,
都係早d訓,留畀有緣睇到既朋友指教。

希望聽朝無雨。

無以為根

呢段日子每日一開電視一用iPad，負面新聞鋪天蓋地，
國外天災人禍；本地禮崩樂壞…
除左令壓力本來好大的都市人更惴惴不安，
同令人懷念簡單平靜的日子，
亦提醒大家雖然未來會點無人知而且人算不如天算，
但居安思危－－更重要係危機意識，非常重要。

兩星期前內地有單新聞，
震撼力如同核爆，
奈何疲於奔命既香港傳媒似乎再無餘力深入報道，
就係內地溫州（Yes，又係溫州）居民買左間二手樓
走去查冊先發現同政治既土地租約得20年，
已經過左期，而續期要畀30萬地價，
溫州樓比香港平，30萬已經係樓價近 3成。

3成。哈哈哈哈哈哈哈哈哈哈哈哈哈哈哈哈
係香港買樓，800萬樓下既樓做到七成按揭，首期係三成，
即係補個地價等於畀多個首期，就算300幾萬既樓都要成百萬啦！
幾多人做左幾年野連首期既三成都未儲到…
而且塊地按揭做20年咋喎！
正當我懶醒咁正想恥笑強國真係沒有最荒謬之際，
忽然感覺有d唔妥，準確d講係不安。

前車可鑑。
今日＿＿，明日香港。（自己填啦。）
嚇到個心都離一離。

一諗到呢度，咸豐年前讀書時代既記憶出返晒黎…
中國歷史上，唔止一次通過土地改革消滅資產階級以達至財富再分配（另一種情況係，當權者無錢時，更赤裸裸既搶劫亦曾發生），
例如明代中後期的一條鞭法，叫攤丁入畝，
即由按丁戶（人頭）收稅改為按田畝（資產）收，
國家財政負擔從此由勞動階層轉移去大地主。

而對上一次，係共產黨上台後的土改，
夾硬將地主手上的地收歸國有，
霸王硬上弓，結果都係一樣，
社會財富再分配。講到明再分配，
係一班人的零和遊戲，
以史鑑今，基本上中國既土地改革，
資產階級都係輸家，其他窮苦大眾贏晒？
就算分唔到一個仙，睇住財大氣粗既太空人跌晒落地，
心理上至少有個對沖，攞到個彩呱？
但可惜，普通大眾仍舊營營役役，
最終得益的往往只是兵不血刃收服利用人民鬥人民達至極端集權的當權者。

與其硬碰硬推政改或者改制取消特別行政區，
最有效減少乃至消滅反對聲音的做法，
不是用警黑合作或者解放軍槍炮子彈，
而是通過財富再分配呃下你氹下你——補地價、土地增值稅，
反正隨時可以巧立名目，
香港有一半人無樓，
已經有相當一部分基本盤，
就算本地激烈反對，
仲有十三億習慣攤大手板問你要錢既同胞做你對家。
的確，共產黨管治下香港出現左好多特權、特殊利益階層，
但如果話香港有錢佬與共產黨既關係其實跟嫖客與流鶯一樣，
相信雖不中亦不遠矣。
既然大家既關係係交易，
當香港利用價值越黎越低，
財富再分配就可以吸埋最後一啖呢支叫「香港」既煙，
香港變成煙蒂，結局不言而喻。

有錢佬落難，窮鬼如我諗下都覺得心涼，
但諗真啲，你其實係心酸，同心寒。
有幾多人打拼大半生只係為一個安樂窩，
如果今日係2047，一聲令下每人補一半地價做稅上繳中央，
有錢變無錢，無錢既都係無錢，
香港即刻會變成「新香港」，
特唔特區已經唔重要了，
呢一刻，或者你會諗既係，
就算香港係一個移民城市，
竟然有好多傻佬傻婆，當呢度係自己既根，
你只希望可以「離鄉別井」，再找別處落地生根。