地產怪股

是咁的,香港樓市癲早已經舉世皆知,
但樓市係回調幾個月後,又再企定反彈(跟據中原城市領先指數數字),
一眾地產股亦表現回勇,
因著好奇,最近搵左好多關於樓市既資料,
每個人都渴望擁有水晶球,
但最終絕大部分(if not all)其實都只係為現實發生既事搵個理由做籍口說服自己接受,哈哈!
不過時間緊迫,留返有時間先同大家詳細討論啦!

所以,今日純粹簡單搵左咁多隻本地既股價同成交量 (Source: 雅虎財經),
當中有個別一兩隻形勢幾有趣的,
到底未來會有乜變化呢?

1113.HK 長實地產

0101.HK 恆隆地產

0083.HK 信和置業

0017.HK 新世界發展

0016.HK 新鴻基地產

0014.HK 希慎興業

0012.HK 恆基兆業

咁多地產股中,新地同恆地係惟二近期成交急降既股票，
其中恆基既成交量同股價大幅度背馳，

作為行業龍頭,呢件係一件相當吊詭既事，
恆基既50天、100天平均成交都係自2010年年初超過5年半以黎最低水平，

股價(經調整收市價)則係近年高位徘徊，

成交少股價悶,卻係(見頂?!)爆單邊前會既景象。

恆地作為本地地產幾大龍頭，

集中發展高密度中小型單位，

可算食正過去幾十年家庭少子化既潮流，

亦最能代表受惠經濟起飛的年輕新中產階層，

恆基今日出成績表，

將是反映香港住宅樓市的重要指標。
如果香港打工仔收入無增長，
樓市已係臨界點，
最近長實地產就表示要轉型，
樓市已近頂位基本上無懸念，
但下行週期卻並一定以雪崩式暴跌發生，
觀乎信貸與按揭狀況似乎不會引發災難，
但辣招之下的確又難以催生大泡沫。

咁我點睇?哈哈哈哈哈哈哈！

香港地做大生意有個神級logic，

就係麵包一定要貴過麵粉，

只要呢句智障廢話仲流傳，

就表示情況未係太差，至少對於一眾天龍人大亨來說是如此。

變臉

話說,今朝8點幾未開市,
電視台係咁講港股點強勢點好,
一開市,所有電話即刻響唔停,
但開市半個鐘倒跌80點,
主持人即刻憂心重重地問:係咪仲有力上呢?
電話線亦都歸於平靜。

哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈

Mr. Market堅係一個痴線佬,
日日對住佢係人都顛,
但作為能屈能伸既講故佬,
只要學識畀兩錢肉緊同極速變臉,
真係長做長有,
好似係,除非唔係。

尋寶

成長於90年代的我,
和同我一齊長大既朋友們,
大部分都有一個放學衝返屋企睇卡通片既童年,
上禮拜書展見到一堆家長買左一喼喼既書同補充,
而家小朋友放假都要操卷操TSA再加要上一堆「興趣班」,
實在感謝當年父母同學校無畀我地太多workload。

講到卡通,要數影響力最大既幾套,
一定係寵物小精靈Poke'mon同數碼暴龍Digimon。
上年唱Digimon主題曲既和田光司不敵癌病復發離世,
fb上一輪洗版潮;
朋友間一陣嘆氣;
一個時代既結束,
意味再不情願都要長大,
進入人生另一階段。

如果話和田離開帶黎哀傷同絕望,
咁幾個星期橫掃全球既Pokemon Go就帶黎興奮同希望,
我地離兒時只能想像同憧憬既世界又近左一步,
呢一刻遊戲玩落仍有種Incomplete既感覺(說來慚愧,我捉精靈進度緩慢,到目前只有55種精靈),
但即使PG唔係第一隻用到GPS既遊戲,
能夠用上AR等新技術,配以如此經典的卡通,
有人用埋無人機等遙控捉精靈,
打破左虛擬同真實世界不行平行玩既界限(以前Wii就帶動作感應,但無法走出屋外),
呢一小步仍然意義重大。

雖然我搵極都未搵到啟暴龍;
御三家亦只有一開始送既奇異種子,
但係尋寶既過程中我跑左成日黃埔、半個馬鞍山,
每日收工都去一d從來無去過或者好耐無去過既地方行個幾兩個鐘,
出一身汗、同陌生人傾幾句偈,
都係過程中既得著。

講開尋寶,咁岩最近有套新電影亦很貼題。
上週末終於去左睇《Finding Dory》,

第一集上映時我讀中一,
沙士剛過,經濟蕭條,
一年都無機會入一次戲院,

咁多年已經幾乎忘記呢齣戲。

電影前半段頗悶,

但後面漸入佳境,

故事寓意頗深,

總算不負Pixar之名。

一條轉個頭連父母叫咩都唔記得既魚,

展開尋親長征之旅,

零碎出現的回憶片段幫助多莉逐一解決危機,
絕對活在當下的多莉總算找到自己的身世,
旅途臨近尾聲,
多莉發現最重要既事,
就係認識自己、搵到自己,
原來呢個無記憶、無過去、一無是處既自己,
唔單止唔係孤單一個,
係其他人心目中亦有獨特既位置。

尋寶既過程遠比結果重要,
因為寶物/目標得一個,
一係搵到,一係搵唔到,
但過程中係學會既技能隨時有四五六七種,
思考方法令你突破自己思想既框框,
限制越多,越迫你你有限資源中發揮無限可能。

每次想到我呢一代人面對種種社會問題同不公,
並不單單存在於香港,
而且呢一刻全世界都無人解決到,
上一代人在山之巔俯瞰,
看不見路途之崎嶇,
但我地一代人所經歷既重重困難,
正正係為解決我呢一代人既問題鋪路,
江山代有才人出,
惟願在尋找令社會向世界變得更好的路途上,
人學會令自己變得更好。

誰在沽匯豐?

只要世界有人,就有金融,

人類係充滿想像力既動物,

我地既祖先能夠走出野外,

靠既唔單係由打獵到耕種,

人類進化至今,

生存更需要動聽既故事,

金融正正係人類想像到極致所衍生出黎,

有唔同Belief既人因著自己所相信既故事做所謂買賣、存貸,

明明只係一堆虛幻既數字,

但又實實在在出現係你我生活當中。

脫歐已成定局,

未投之前大家驚到不得了,

到頭來就算投左脫歐,

最壞既情況仍然無發生,

而轉眼間到美國銀行業績期,

似乎又唔係好受對面海影響,

不過對面海既行家似乎就無咁好彩。

講緊係匯控(0005.HK),

即使管理層保證會維持派息,

股價似乎好一段時間都無起色,

雖然散戶一次又一次頂住泰山壓頂既沽盤,

脫歐當日單一隻匯豐已經過百億成交,

難免會令人好奇,到底邊個係度買貨?

又有邊個係到沽貨?

如是者,就順便搵埋過去2014年到而家既CCASS變化,

挺有趣的,畀大家望一望:

(source: webb-site)

原來,由上年12月中開始,負責處理港股通交收既中國證券登記結算

有限責任公司(china securities depository and clearing)經歷過幾輪掃貨,

現在已經係匯控係CCASS既第五大持倉登記人(前四位分別為匯豐、花旗、中銀、渣打),

截至7月15日,佔所有已發行股份既2.51%,

以收市市值約9千9百億計,值成2百幾億。

係呢段時間,除左滬港通既買盤外,

中銀係最積極增持匯控,

由2014年10月開始,

登記係中銀CCASS倉入面既匯豐由3.23億股升至6.26億,

以股數計多左接近一倍;

而花旗所持股量亦有所增加,

而減持得最多既係摩根大通,

同2014年年頭比,足足減少左一半,

持股比例由大約3.33%跌至不足1.7%,

排名亦由第二跌落第七。

而整體黎講,

由14年年中至今,匯控係CCASS入面登記既股數不斷上升,

As at 2014年1月,匯控已發行股數係CCASS對non-CCASS既比例係30.67%對69.33%;
而到今年7月中,兩者比例已經變成39.33%對60.67%,
如下圖:

(source: webb-site)

兩者此消彼長,不斷有貨流入CCASS,
好多時將貨拎入CCASS係為方便沽貨,
但入左又唔代表會即時沽,
但都會影響供求,咁會對股價有咩影響呢?
或者下次可以補埋股價圖同時序表一齊做下功課。

而最底一條紅線,係Brokers揸貨(經紀/券商直接持有),
藍色Custodians即係代客持有,
例如你係中銀有股票戶口,買左好多5號,
d貨就係計入經紀代客持有。
表面上,Brokers揸貨係呢段時間入面都由4.52%升到8%,
不過就算多左3%都不能完全解釋流入CCASS既10%貨去左邊,
除左可能大家心太淡將d萬年實貨拎返晒出黎之外,
都要小心有d大戶因睇淡而悄悄減持,

打完文發現又到禮拜一,
祈求工作順利、今個禮拜唔好再落雨。

總要在雨天

記得一月尾一個落大雨既朝早,

遲起身趕返工仲要截唔到的士,

返到公司都成十點。

但係我開口咀咒自己既不幸之前,

同事竟然仲早過我講粗口,

原來就係嗰幾分鐘,恆發洋參(0911.HK)股價高台跳水,

我就明白,世界上畢竟有好多人比自己不幸,

而且好多事其實可以突然間發生係你眼前。

事隔唔夠半年,1月28日上晝既事仲瀝瀝在目,

咁岩今朝(7月6日)又落大雨,

返到公司膝頭以下都濕晒,

偏偏有另一間公司股價亦都直墮懸崖超過九成,

睇黎唔止分手,連＿＿都總要在雨天。

公司叫樂亞國際(8386.HK / 8195.HK),

8字頭既股票,未必好多人識,

但高峰期市值過百億既佢,

其實係一家紡織品製造商,

相比之下,呢幾年掙扎轉型而股價每況愈下既思捷環球,

以今日收市價5.76元計,

市值只有111億,

一家代工廠比品牌更值錢,

唔係話唔得,富士康都大過唔少山寨品牌N倍,

但名不經傳又分餅唔大既企業,

如果無一堆莊家參與,

係唔會有嗰個價。

如果用心留意恆發同樂亞,

其實有好多共通既地方:

1) 股價大幅攀升,短時間內已經遠超招股價

2) 交投少,令股價係跳水前有一段時間高居不下,莊家散唔到貨

3) 開市時間排盤疏落,造成股價易有大波幅

4) 最重要但亦係最難知既一樣,係大股東押左股畀證券行/財仔

相比起又合又供既財技股,

其實係股價第一波大地震時傷既應該唔算多,

但之後幾波餘震就可能因為貨流左入市場變成人踩人,

所以行走江湖,萬事小心為上。

水都抽到七七八八,

下面做返多少功課記錄在案,

希望以後有相似既情況時可以及早發現借鑑。

十間啤殼上市既公司,十間都有莊家揸住重貨,

為左方便散貨走人,d貨已經登記晒係中央倉(CCASS),

所以,如果可以睇到呢間公司既CCASS既持股分佈,

就可以搵到到底邊幾間行揸莊。

感謝David Webb同webb-site,

每一間上市公司CCASS倉由咩人揸貨、一個莊揸住邊幾隻貨只係click兩下就一目了然。

時間關係,由今1月1號到今日(港股T+2交收,實質係星期一既交易)既CCASS分佈如下:

(source: webb-site)
可見有過半貨在CCASS,當中又以Brokers(證商直接持有)佔多數,Custodians(證商代客持有)只佔很少數。

(source: webb-site)
呢張圖打仗咁亂,
講緊既係由1月1日至今,
做左T+2日交收後持有最多樂亞股票嗰15間行,
以及佢地持股既比例。
可以見到由6月尾至7月4日,
Custodians突然升(6月尾的交易,T+2變7月頭交收,7月4日交易則今日交收),
揸最多貨鼎成及海通開始散貨,
睇第一張圖見到,散左既貨流左出街(由Brokers轉左去Custodians),
睇落只係郁好少,
但相對一隻排盤疏落既股票,
其實莊家多數都已經等到好唔耐煩。

有心人或者可以參透到更多,
不過聽日唔係weekend,
為左可以精精神神過我兩點一線既生活,
都係早d訓,留畀有緣睇到既朋友指教。

希望聽朝無雨。

無以為根

呢段日子每日一開電視一用iPad，負面新聞鋪天蓋地，
國外天災人禍；本地禮崩樂壞…
除左令壓力本來好大的都市人更惴惴不安，
同令人懷念簡單平靜的日子，
亦提醒大家雖然未來會點無人知而且人算不如天算，
但居安思危－－更重要係危機意識，非常重要。

兩星期前內地有單新聞，
震撼力如同核爆，
奈何疲於奔命既香港傳媒似乎再無餘力深入報道，
就係內地溫州（Yes，又係溫州）居民買左間二手樓
走去查冊先發現同政治既土地租約得20年，
已經過左期，而續期要畀30萬地價，
溫州樓比香港平，30萬已經係樓價近 3成。

3成。哈哈哈哈哈哈哈哈哈哈哈哈哈哈哈哈
係香港買樓，800萬樓下既樓做到七成按揭，首期係三成，
即係補個地價等於畀多個首期，就算300幾萬既樓都要成百萬啦！
幾多人做左幾年野連首期既三成都未儲到…
而且塊地按揭做20年咋喎！
正當我懶醒咁正想恥笑強國真係沒有最荒謬之際，
忽然感覺有d唔妥，準確d講係不安。

前車可鑑。
今日＿＿，明日香港。（自己填啦。）
嚇到個心都離一離。

一諗到呢度，咸豐年前讀書時代既記憶出返晒黎…
中國歷史上，唔止一次通過土地改革消滅資產階級以達至財富再分配（另一種情況係，當權者無錢時，更赤裸裸既搶劫亦曾發生），
例如明代中後期的一條鞭法，叫攤丁入畝，
即由按丁戶（人頭）收稅改為按田畝（資產）收，
國家財政負擔從此由勞動階層轉移去大地主。

而對上一次，係共產黨上台後的土改，
夾硬將地主手上的地收歸國有，
霸王硬上弓，結果都係一樣，
社會財富再分配。講到明再分配，
係一班人的零和遊戲，
以史鑑今，基本上中國既土地改革，
資產階級都係輸家，其他窮苦大眾贏晒？
就算分唔到一個仙，睇住財大氣粗既太空人跌晒落地，
心理上至少有個對沖，攞到個彩呱？
但可惜，普通大眾仍舊營營役役，
最終得益的往往只是兵不血刃收服利用人民鬥人民達至極端集權的當權者。

與其硬碰硬推政改或者改制取消特別行政區，
最有效減少乃至消滅反對聲音的做法，
不是用警黑合作或者解放軍槍炮子彈，
而是通過財富再分配呃下你氹下你——補地價、土地增值稅，
反正隨時可以巧立名目，
香港有一半人無樓，
已經有相當一部分基本盤，
就算本地激烈反對，
仲有十三億習慣攤大手板問你要錢既同胞做你對家。
的確，共產黨管治下香港出現左好多特權、特殊利益階層，
但如果話香港有錢佬與共產黨既關係其實跟嫖客與流鶯一樣，
相信雖不中亦不遠矣。
既然大家既關係係交易，
當香港利用價值越黎越低，
財富再分配就可以吸埋最後一啖呢支叫「香港」既煙，
香港變成煙蒂，結局不言而喻。

有錢佬落難，窮鬼如我諗下都覺得心涼，
但諗真啲，你其實係心酸，同心寒。
有幾多人打拼大半生只係為一個安樂窩，
如果今日係2047，一聲令下每人補一半地價做稅上繳中央，
有錢變無錢，無錢既都係無錢，
香港即刻會變成「新香港」，
特唔特區已經唔重要了，
呢一刻，或者你會諗既係，
就算香港係一個移民城市，
竟然有好多傻佬傻婆，當呢度係自己既根，
你只希望可以「離鄉別井」，再找別處落地生根。

笑話

很久沒有寫Blog。

這個Blog是我在大學Year 3的某日建立，
事源Year 2參加Business School的International Exchange Programme去了加拿大UWO，
人生有幸第一次去外國生活，
衝擊甚大，返香港最想做的事之一，
就是紀錄自己不同時期的想法心事，
萬一將來有日發癲，或者變左一個窮凶極惡的壞人，
睇返以前既自己，可能救得返。

由建立之初，接下來的大半年間，
斷斷續續寫了幾篇文章，
絕大部分仍是一份Draft從未發佈過，
卻在考試搵工的忙碌中，
完全遺忘掉，一直掉空至今。

最近在思考生活的轉變時，
忽然想起這個Blog，想起那些從未Publish的Entries，
老實說，再讀自己寫的東西，
感覺挺有趣的。

有趣的是，我竟然認不出三年前的自己，
那一個我，在見識、視野上，
絕對超越現在的我，
海明威(Ernest Hemingway)說：「There is nothing noble in being superior to your fellow man; true nobility is being superior to your former self.」
我想，現在的自己一點也不Noble，
甚至有點卑賤。

既然之前未發，
就現在補發，首先是2011年11月的Entry：

《笑話》
特首選舉是一個笑話，
說來應該沒有多少香港人會反對。

糾結了幾個月,
選還是不選竟然沒定論,
結果阿豬阿狗皆「疑似候選人」也。
奇怪的是明明還沒報名,
諸位疑人之舉動,
卻已長期霸佔了各大報章數頁港聞版甚至是頭版之篇幅。

這些新聞並沒有實質價值,

但在這新聞娛樂化的年代,

大家不難明白,

這些新聞有市場。

每每劇情峰迴路轉處,

就是「我當堂嚇左一跳,然後得啖笑」,

像已表態的人大常委竟在「道德高地」上叫「政協副主席」「不宜表態」,

理由是後者為「國家領導人」,

讀過中國政制的朋友都知道,

人大常委是中國最高權力機關全國人大的核心部分,

政協性質上是「顧問」,

很多人稱之為花瓶也。

想不到人到焦急處,

說話可以這樣無賴。

總有人認為作為香港人,

關心香港時事是公民責任,

但在700萬人中只有24萬選委選民,
24萬人中更只有1200個選委,
是百分之三乘上百分之五的比例,
若是隨機分佈,
中獎機會也不比中六合彩三獎高多少。

在沒有選舉權,

又欠缺參與機會的市民心中,

關心特首選舉比關心文化中心下齣劇目一樣不設實際。

說得坦白一點,

到底東亞李大班為誰誰撐腰(當然還包括他口中「五六十名銀行家」);

還有上了神枱的董伯支持誰,

就與大行sell-side的報告一樣,

那位做初一,另一位做十五的吹水,

I dun give a DAMN.

我只知道取消遺產這等「功績」,

身家起碼要有七百五十粒的人才會感受到,

千萬身家以上的人更高興,

因為慳了七位數字的稅款。

在美國,遺產稅可高達遺產的一半,

仍能吸引世界各地之人才,

若以取消香港那百分之十五的遺產稅稅吸引人才,

是過分放大其作用,

受惠的仍只有那1%的人口。

在香港這個有一百二十萬貧窮人口的城市,

百萬富翁(美元淨資產)的人數以飛速增長也不過十萬多人(剛好超過要免稅額),

政策是利,何其遙遠也?

有云「小惠未遍,神弗福也」,
社會上層看到的德政,
在底層大眾看來,
是完全不同的風景。

不知下一位站出來說話的大款,

說話能否更sensible?

更甚者,回歸十年有餘,
特首之於香港,到底是什麼樣的一個角色呢?
除了每年到北京求中央多給點優惠,
香港是不思進取地在原地踏步,
經濟產業結構更集中,
抗風險能力就更弱了,
說好的六大產業,
也許要在陳年舊報告裏翻找。
香港沒有資源可以自給自足,
但至少,得動腦筋使自己不只是一個搖尾乞憐的累贅。

說了太多無關痛癢的事,
今天社會發生的事,
大可以當一個個笑話聽,

畢竟,結果如何,
七百萬人中的99.99%都只有食花生的份兒。

不值得期待的事

在生活處於低谷時,
人對那怕只有一點點希望的事都充滿期待,
不過,好些時候等待著我們的,
都並不如我們想像的會為我們解決問題,
事實上,我們所期待發生的事,
帶來的問題很可能會更多更大。

雖然QE2開始貨幣寬鬆政策對刺激經濟效果輕微,
但自歐債危機升溫開始世界都在期待QE3,
股市在上上落落間,
似乎忘記了在實體經濟中我們忍受著高通脹、負利率和資產泡沫的困擾,
我並非否認QE3會為市場帶來一陣樂觀情緒,
環球市場更很可能因而上揚,
那不就是一支嗎啡嗎?
有痛就止痛,有何不好?

回到現實,我們要想的是,QE3能夠為我們帶來什麼呢?
資金泛濫使利息持續低下,
借貸成本維持低水平,
然而在經濟困境下大部分投資都繼續難有回報......

而我們要謹記,更便宜的錢意味著更高的通脹與樓價,
香港社會有極端的財富再分配效應,
只有當窮人的薪金賽不過通脹時,
人工佔公司開支比重下降,
有錢人才能夠越來越富有,
所以大家都明白,這個遊戲打工仔永遠無法羸。
QE3為大家帶來的,就只有更艱苦的日子而已。

言歸正傳,貨幣發行與實體經濟脫離太遠,
只會為最終仍回到來的衰退埋下伏線。
香港樓價最近重新熾熱,
這可不是一個好訊號,
今天有線新聞電話訪問了一個有意賣樓的居屋業主,
叫價從不久前的190萬急升至280萬,
無他,妄想發財而已。

當所有樓不論豪或不豪、私或公(居屋和曾是公屋的),
買了即使是呀豬呀狗都向上升的日子,
歷史上出現過不少次,
只是每次都以不同形式在不同時空出現,
有鬱金香、南海公司、1920年代末的美國股市、科網泡沫和本世紀初的美國房地產市場等,
大家稱這作「泡沫」,帶點童話意味,
但這種超現實不正如反映現在的情況嗎?
過去二十年,不計入金融業,
香港的大學畢業生工資幾乎無增長,
入息中位數在2萬元左右掙扎,
而樓價卻則節節上升,
眼前的景況除了超現實外,實在難以形容。
當然未有錢置業的我一定要食花生,
而看泡沫的有趣之處是你不知道情況何時會轉壞,
一瞬間一堆人發現自己的資金被套牢,
成了負資產也。
特首擔心人買不起樓,
我更擔心一街無賴蝕了錢輸打羸要。

話題又回到我們的QE3上來了,
伯南克在Jackson Hole講話,
到底會不會宣佈QE3呢?
當然說這個問題大家都是在猜(不用認真,反正猜不中也不是什麼新鮮事。)
但似乎這回QE3出台的機會並不高,
8月中至後公佈的美國大部分最新經濟數據都超出預期,
從就業情況到消費數字各方面都表示美國經濟開始重獲活力,
最重要的是資金持續流入,
說實話有熱錢關照經濟表現很難會很差。

QE3能否再進一步推動經濟增長或許不是重點,
重點是美國如何應對大西洋對岸的問題。
雖然歐元區解體無疑對美國是好事(也只有美國有能力和有動機去引發這場危機),
但並不代表美國不會受到衝擊。
加上即使本土經濟可能向好,
美國政府本身仍有嚴重的財政問題要解決,
只是對歐元區危機的恐懼蓋過了人們對這件事應有的關注,
卻不表示問題簡單,
在這一刻,大規模的貨幣政策就十足Matrix中那些軍艦用一次自己便癱瘓聽宰的電脈衝,
而彈藥極有限的美國應該不會傻到現在開火吧?

當然,人們普遍還會繼續期待,
畢竟,生活中值得期待的事太少了。

政治家不務正業 操縱情緒背後的悲哀

投資者要當心了。

已經有好一段時間,政治家與央行行長不停在企圖操縱市場情緒,
而沒有更實在的對應危機之策(很抱歉,不是指QE,至少我不認為QE能起什麼作用)推出之際,
其實反映了大家對解決問題的信心有多少。

雖然過去一星期恆指總體表現比過去幾星期好,
但幾乎可以肯定地說,
最壞的情況尚未來臨。
面對2013和2014兩年的債務償還高峰期,
即使PIIGS熬過今年,
經濟持續衰退的國家只會越來越無力還債,
不管是由EFSF大舉買債或是大規模重組債務,
都不能解決歐元區國與國之間經濟實力懸殊造成國家貧富兩極化的現象,
過去十年低生產力國因著與強國使用統一貨幣,
相對其生產力而言過度消費,
歐元區缺乏統一財政政策,
不能將強國如德國從與其他成員國貿易賺取的盈餘有效地分配到其他國家(當然德國人不會願意,畢竟歐元區的誕生就是建立在強國的經濟利益上),
所以歐元的命運其實大致上已經清楚明白了,
問題在於時間。

今年內歐元區發生大規模違約的機會不大,
但隨著歐洲經濟惡化、中國經濟失去動力、美國經濟低增長持續,
往後幾年將會是罕見的低位。

Bill Gross說:「股市已死」
這也許意味了一個極度悲觀點(Point of extreme pressimism)的到來。

歷史總在以不同方式重演,
在過去一百年裏世界多次危機中,
在解決方法出現前一秒,
沒有人會相信風暴快將過去。

內地經濟後勁無力 內銀暗湧處處

上星期傳出有公司倒閉令建行壞帳恐增30億,
其後內銀股被拋售,
四大內銀均跌至今年低位,
即使如今四行平均市盈率不足6,
本人認為估值卻不便宜,
原因主要有有三方面:

一) 內地經濟將持續向下
事實上,國內外專業投資者絕大部分都不相信中國的GDP增長數字(如果相信中國經濟有增長的話),
因為GDP在中國不過是數字遊戲,
即使假設中國官員不如以往大躍進時期將數字層層倍數發水,
GDP=C+G+I+NX從計算上本身就存在盲點,
中國五成的GDP數字來自投資,
當中固定資本型成(Gross Domestic Fixed Capital Formation)又佔一大部分,
所謂固定資本型成,
簡單的理解是製造Capital Assets,
從建廠、建鐵到建路,
都是中國主要的投資支出。
當然,好的投資項目一般只佔少數,
不管是政府還是私人機構,
這都是應謹慎行事的決定。
當2008年金融海嘯一至,
內地政府加速投資,
原本要分批分期進行的工程同時開工,
眼下中國政府卻是未來一段時期都再無具回報的重大投資可做,
還有不少基建項目因缺乏資金被迫暫停,
至於民間境況則更為慘淡,
政府於09年起實施多項補貼,
許多公司頓時業績亮麗,
隨即加速擴充業務,
卻不知廠房未建成,
歐元區潛伏的危機爆發,
令佔中國出口量大部分的民企一下子跌到關乎生死存亡的關口,
又多少死傷雖無法得知,
但短期內要企業大規模投資已是不可能了。
在這樣的前提下,內銀收入很可能收貸款急降影響,
即使政府可能短期內會多次出手刺激借貸,
債務纏身的地方政府與民企亦不大可能再大舉進行投資,
此乃第一點不利因素。

二) 銀行存貸息差收窄
長久以來,內銀傲視一眾內資行的盈利和高增長源於官方所定的存款和貸款利率,
兩者的相距即淨息差保證了內銀的驚人的盈利能力,
就2011年來說,四大內銀的存貸淨息差都在百分之三或以上,
本地銀行如恆行、中銀香港淨息差只有百分之二左右,
外資匯豐銀行與星展的淨息差也在百分之二左右,
但本年至今內地已多次調低存貸基準率,
最近一次下調貸款息率的力度加大,
使淨息差收窄,
既反映內地經濟疲弱政府急於刺激借貸,
亦反映內銀受政府庇護越來越少,
經濟疲弱使政府再減基準利率機會不斷增加
(特別是如前面所說,中國政府政策手段已所餘不多時更是如此。),
利潤率會進一步受壓,
即使龍頭地位不變,
生意亦不如以往易做。

三) 壞帳風險高　資產負債表恐急速惡化
收入跌、利潤跌,都不如資產價值暴跌來得可怕,
民企過度借債以至倒閉的陰影自去年傳出溫州大量民企老闆出走開始便揮之不去,
到最近這幾天又有杭州幾百位老闆聯手請願,
其實,民企缺水的嚴重程度如何,
其實可從去年下年半至今大市波動不穩仍有不少民企來港上市略知一二,
試問如果公司業積優異,
又怎會選擇在市場如此混亂的時間上市集資呢?
要知道眾多融資方法中IPO成本是最高的,
在牛市中管理層會爭先恐後不計融資成本地把手上的股票賣給你,
但可以選擇的話又有誰會在這種時候給投資銀行狠賺一筆呢?
但我最擔憂的是國有銀行大量的隱性負債,
以及它們為地方政府基建項目融資所帶來的風險,
隨著越來越多項目停工,
回報週期不斷延長,
即使是已建成的項目如鐵路項目等,
回報率也是奇低,
兩個月前鐵道部發表文章,
鼓勵民資投資鐵路項目,
是危險的訊號,事實上,
世界上大部分鐵路項目都是無甚利潤可圖的生意,
由政府承擔這些項目數以萬億元的建設成本,
還有遙遙無期的回報週期,
值得一想的是鐵路部和公路部兩者的總負債超過四萬億,
除以十三億是三千多元,
即過去幾年中國人民為中國的基建項目人均付出了大半年的收入,
中國政府還沒有富裕到可以為一切建設賣單,
更何況是分散了的國有銀行呢?

國有銀行是一種奇怪的存在,
雖然先天優勢是能借助雄厚資本得到為最優質的項目融資的機會,
但同時亦被迫承擔政府/國企的垃圾資產和項目,
曾經四大國有銀行在上市前技術上都已破產,
但如今轉換以較貼近商業銀行的模式運行,
的確可使效率提升,經營得更好,
但說穿了,現代經濟體系中銀行是百業之母,
銀行的表現與整體經濟情況息息相關,
隨著中國經濟增長實際上放緩(數字上不理),
幾年後的中國經濟平均增部甚至可能只有百分之五以下,
國有銀行的經營環境將會比以往困難得多。